TANESCO SHINYANGA YAFANYA JITIHADA KUREJESHA UMEME

 

Shirika la Umeme Tanzania (TANESCO) Mkoa wa Shinyanga, linaendelea na jitihada za kurejesha huduma ya umeme katika maeneo mbalimbali ya Manispaa ya Shinyanga, baada ya huduma hiyo kukatika tangu jana, Septemba 22, 2026, majira ya saa tano usiku.

Akizungumza na SHINYANGA ONE MEDIA, Meneja wa TANESCO Mkoa wa Shinyanga, Mhandisi Hadija Mborouk, amesema kukatika kwa umeme kumetokana na hitilafu iliyotokea katika kituo cha kupozea umeme cha Matanda, kilichopo mjini Shinyanga, na kuathiri sehemu kubwa ya mji wa Shinyanga.

Mhandisi Mborouk amesema mafundi wa TANESCO wanaendelea na kazi ya kubaini na kurekebisha hitilafu hiyo, ambapo makao makuu ya Kanda ya Magharibi (Tabora) wametuma wataalam kuja kuongeza nguvu katika zoezi la kurejesha huduma hiyo.

Amewaomba wananchi kuwa na subira wakati TANESCO ikiendelea na jitihada za kutatua tatizo hilo na kurejesha huduma ya umeme katika maeneo yaliyoathirika.