KAMATI YA BUNGE YA TAMISEMI YARIDHISHWA NA HATUA YA UTEKELEZAJI WA MIRADI KAHAMA

Kamati ya Kudumu ya Bunge ya Tawala za Mikoa na Serikali

za Mitaa (TAMISEMI) imeridhishwa na hatua iliyofikiwa katika utekelezaji wa miradi mbalimbali ya maendeleo katika Manispaa ya Kahama, mkoani Shinyanga.

Kauli hiyo imetolewa na Mwenyekiti wa Kamati hiyo, Florent Laurent Kyombo, Jumamosi tarehe 17, Oktoba, 2026, baada ya Kamati kutembelea na kukagua ujenzi wa wodi ya kisasa ya Mama na Mtoto katika Hospitali ya Manispaa ya Kahama, Kituo Kikuu cha Mabasi Mbulu kinachoendelea kujengwa katika Kata ya Nyasubi, Soko la Sango linaloendelea kujengwa katika Kata ya Nyasubi, Kituo Kidogo cha Mabasi Zongomela na Soko la Wajasiriamali Wadogo Zongomela ambavyo vyote vinajengwa katika Kata ya Zongomela.

Mwenyekiti wa Kamati ya kudumu ya Bunge ya TAMISEMI Florent Laurent Kyombo

Akizungumza kwa niaba ya Kamati, Kyombo ambaye pia ni Mbunge wa Jimbo la Missenyi mkoani Kagera, amepongeza uongozi wa Manispaa ya Kahama, ukiongozwa na Meya Mataluma Kaniki na Mkurugenzi wa Manispaa hiyo Masudi Kibetu, kwa hatua ya kutumia mapato ya ndani kuanzisha ujenzi wa Jengo la kisasa la wodi ya Mama na Mtoto unaotarajiwa kugharimu zaidi ya Shilingi bilioni 6 mpaka kukamilika kwake.

Mstahiki Meya wa Manispaa ya Kahama Mataluma Kaniki

Kyombo amewataka viongozi wa Mkoa wa Shinyanga na Wilaya ya Kahama kusimamia miradi hiyo kwa karibu ili ikamilike kwa wakati, huku akisisitiza kuwa, wananchi waliokuwa wakifanya shughuli za kibiashara katika maeneo ya miradi ya masoko na vituo vya mabasi wapewe kipaumbele katika ugawaji wa vibanda.

Aidha, ameshauri gharama za upangishaji wa vibanda zizingatie uwezo wa kiuchumi wa wananchi, pamoja na kutengwa kwa maeneo ya kutolea huduma muhimu ikiwemo vituo vya polisi kwa ajili ya usalama na huduma ya kwanza kwa watu wanaopata changamoto ya kiafya.

Mkurugenzi Mtendaji wa Halmashauri ya Manispaa ya Kahama Masudi Kibetu

Wakati huohuo, Kaimu Katibu Mkuu wa Ofisi ya Waziri Mkuu – TAMISEMI, John Cheyo, ameahidi kushirikiana na uongozi wa mkoa kuhakikisha maelekezo ya Kamati yanatekelezwa, huku Katibu Tawala wa Mkoa wa Shinyanga, Pili Mnyami, akiihakikishia Kamati hiyo kuwa, miradi hiyo itakamilika kwa wakati na kuanza kutoa huduma kwa wananchi.

Kaimu Katibu Mkuu wa Ofisi ya Waziri Mkuu – TAMISEMI, John akizungumza mbele ya Kamati ya TAMISEMI

Mnyami amesema anatambua dhamira ya Rais Dkt. Samia Suluhu Hassan katika kuwaletea wananchi maendeleo, ambapo alitumia nafasi hiyo kuwataka watendaji wa Serikali kutokuwa kikwazo katika utekelezaji wa miradi hiyo.

Katibu Tawala wa Mkoa wa Shinyanga, Pili Mnyami akizungumza mbele ya Kamati ya TAMISEMI

Naye Mbunge wa Jimbo la Kahama, Benjamin Ngaiwa, ameishukuru Serikali ya Awamu ya Sita chini ya Rais Dkt.Samia Suluhu Hassan kwa kupeleka fedha nyingi kwa ajili ya kutekeleza miradi mbalimbali katika Jimbo lake, huku akiwahimiza wananchi kuunga mkono juhudi za Serikali katika kuwaletea maendeleo.

Pia, amemtaka mkandarasi kuhakikisha vituo vya mabasi vinatengewa maeneo maalumu kwa ajili ya maegesho ya bajaji na pikipiki, ili kuwawezesha vijana waliojiajiri kupitia biashara hiyo kunufaika na uwepo wa miradi hiyo.

Mbunge wa Jimbo la Kahama, Benjamin Ngaiwa

Akizungumza kwa niaba ya Mkuu wa Wilaya ya Kahama, Mkuu wa Wilaya ya Kishapu, Peter Masindi, amemshukuru Rais Dkt. Samia kwa ufadhili wa miradi hiyo mikubwa ya Kimkakati na kuwahimiza wananchi wa Kahama kutumia fursa za kiuchumi zitakazotokana na miradi hiyo kufanya kazi kwa bidii na kuwekeza kwenye biashara, kwa kuwa tayari Serikali imewawekea mazingira wezeshi ya kujikwamua kiuchumi.

Pia, amewashauri wajasiriamali wadogo kuchangamkia mikopo yenye masharti nafuu inayotolewa na Serikali kupitia Benki ya NMB, ili kuongeza mitaji yao.

Mkuu wa Wilaya ya Kishapu, Peter Masindi akizungumza kwa niaba ya Mkuu wa Wilaya ya Kahama mbele ya Kamati ya TAMISEMI na wananchi

Kwa mujibu wa taarifa iliyotolewa na Ofisi ya Mkurugenzi wa Manispaa ya Kahama, tayari Halmashauri hiyo imetenga Shilingi bilioni 4.4 kutokana na mapato yake ya ndani kwa ajili ya utekelezaji wa mradi wa ujenzi wa wodi ya Mama na mtoto, ambapo Serikali Kuu imechangia Shilingi bilioni moja.

Mhandisi Mshauri wa Manispaa ya Kahama Samuel Mtawa akisoma taarifa ya utekelezaji wa miradi mbele ya Kamati ya kudumu ya Bunge ya TAMISEMI

Mpaka sasa, zaidi ya Shilingi bilioni 3.9 zimetumika katika hatua iliyofikiwa ya ukamilishaji wa ujenzi wa mradi huo, unaotekelezwa na mkandarasi SUMA JKT ambao ulianza Januari 23, 2023, na unatarajiwa kukamilika Juni 4, 2027.

Kwa upande wa miradi ya Kituo Kikuu cha Mabasi Mbulu, Soko la Sango, Kituo Kidogo cha Mabasi Zongomela na Soko la Wajasiriamali Wadogo Zongomela ambayo ilianza kutekelezwa Desemba 31, 2024, inatarajiwa kukamilika Desemba 30, 2026.

Miradi hiyo inatekelezwa na kampuni za SIHOTECH Engineering Ltd kwa kushirikiana na AMJ Multi Contractors, kwa gharama ya zaidi ya Shilingi bilioni 27, kupitia Mradi wa Uendelezaji wa Miji Tanzania (TACTIC) unaosimamiwa na Ofisi ya Waziri Mkuu – TAMISEMI.

PICHA MBALIMBALI ZA MWONEKANO WA HATUA ZA UTEKELEZAJI WA MRADI WA UJENZI WA WODI YA MAMA NA MTOTO KATIKA HOSPITLI YA MANISPAA YA KAHAMA