PADRE MASOLWA; MSAMAHA UNAVUNJA MZUNGUKO WA CHUKI, MAUMIVU YA KIHISIA, VISASI NA KUJENGA JAMII YENYE UMOJA

 

NA SIMEO MAKOBA-SHINYANGA

Paroko Msaidizi wa Parokia ya Ndala, Jimbo Katoliki Shinyanga, Padre Simon Masolwa, amewataka watu wote wakiwemo wakristo kujenga utamaduni wa kusameheana na kuombana msamaha wanapokoseana, akieleza kuwa hatua hiyo ni muhimu katika kuimarisha amani, upendo na ustawi wa familia na jamii kwa ujumla.

Padre Masolwa ametoa wito huo wakati akiadhimisha Misa ya Sherehe ya Somo wa Jumuiya ya Mtakatifu Yohane Paulo II, Parokia ya Ndala, ambapo amemtumia Mtakatifu Papa Yohane Paulo II kama mfano wa kuigwa katika kusamehe, hata pale mtu anapokabiliwa na maumivu makubwa kutokana na makosa ya wengine.

Padre Simon Masolwa

Amesema binadamu wote wana mapungufu na wanaweza kukoseana, lakini uwezo wa kusamehe na kuomba msamaha ni miongoni mwa hatua muhimu zinazoweza kuponya majeraha ya kihisia, kuondoa chuki na kuzuia visasi vinavyoharibu mahusiano katika jamii.

Akifafanua mfano wa Mtakatifu Papa Yohane Paulo II, Padre Masolwa amekumbusha tukio la Mei 13, 1981, ambapo kiongozi huyo wa Kanisa Katoliki alipigwa risasi na kujeruhiwa na Mehmet Ali Ağca, raia wa Uturuki, katika Uwanja wa Mtakatifu Petro, Vatican.

Mtakatifu Papa Yohane Paulo II

Licha ya shambulio hilo, Papa Yohane Paulo II alionyesha moyo wa msamaha kwa kumtembelea Ağca gerezani Desemba 27, 1983, alipokuwa akitumikia kifungo cha maisha, na kuzungumza naye faraghani.

Papa Yohane Paulo II alipomtembelea Ağca gerezani Desemba 27, 1983

Padre Masolwa amesema mfano huo unapaswa kuwafundisha watu kuwa kusamehe si ishara ya udhaifu, bali ni uamuzi unaoweza kumkomboa mtu kutokana na mzigo wa chuki, hasira na maumivu ya kihisia.

Ameonya kuwa kutosamehe kunaweza kuendeleza migogoro ya kifamilia na kijamii, ikiwamo baina ya wanandoa, ambao wakati mwingine hushindwa kuishi kwa upendo, kusaidiana na kutimiza wajibu wao kutokana na makosa ya zamani ambayo hawajayamaliza kwa njia ya mazungumzo na msamaha.

Amewahimiza wanandoa kuachana na kiburi, kuwa tayari kuzungumza wanapokoseana na kujenga moyo wa kusameheana ili kulinda amani ya familia na kuhakikisha watoto wanakulia katika mazingira yenye upendo na mshikamano.

Aidha, amewataka watu wanaowakosea wengine kutambua maumivu wanayosababisha, kuomba msamaha kwa dhati na kujitahidi kutorudia makosa hayo. 

Kwa upande mwingine, amewahimiza waliokosewa kuwa tayari kusamehe na kujenga upya mahusiano yao.

Amesisitiza kuwa msamaha haupaswi kuwa kisingizio cha kuendeleza makosa au ukatili, bali uambatane na kutambua kosa, kuwajibika na kuchukua hatua zinazosaidia kuzuia madhara kujirudia.

Wakati huohuo, Padre Masolwa amezindua rasmi Jumuiya ya Mtakatifu Yohane Paulo II, iliyoanzishwa Machi 1, 2026, baada ya kumegwa kutoka sehemu ya Jumuiya ya Mtakatifu Maria Magdalena.

Misa hiyo pia ilihudhuriwa na wawakilishi wa madhehebu mbalimbali ya dini, wakiwamo Waislamu, Waadventista wa Sabato na wawakilishi wa makanisa ya Kipentekoste, pamoja na viongozi wa kijamii akiwamo mwenyekiti wa mtaa.

Ushiriki wa wawakilishi hao umeonyesha umuhimu wa kuvuka mipaka ya tofauti za kidini na kijamii katika kujenga umoja, kuheshimiana na kuimarisha upendo miongoni mwa watu.

Ujumbe wa Padre Masolwa unaikumbusha jamii kuwa amani huanzia katika mahusiano ya kila siku, kutambua makosa, kuomba msamaha na kuwa tayari kusamehe. Hatua hizo zinaweza kusaidia kuvunja mzunguko wa chuki na visasi, na kujenga familia na jamii yenye mshikamano.